Op der Kamala Harris hir Positioun a punkto Ofdreiwung ugeschwat, huet de Kardinol geäntwert hie géing ee Recht op eng Ofdreiwung ëmmer ofleenen, och bei Vergewaltegungen oder Inzest géing hie keng Ausnam maachen.
Dem Kardinol seng Aussoe géinge weisen, wéi ee Stellewäert Fraen an der Weltuschauung vun der kathoulescher Kierch hätten, ass et d‘Kritik an engem gemeinsame Communiqué vun ënnert anrem CID Fraen an Gender, Planning Familial, OGBL, déi gréng, an déi lénk.
Och de Poopst hätt sech virgëschter bei senger Visitt net mat patriarchaleschen Äusserungen zeréckgehalen a gefuerdert, zu Lëtzebuerg misste méi Kanner op d‘Welt gesat ginn. Familljeplanung a Sexualitéit wieren eng Privatsaach an et wier weder um Poopst, nach un der kathoulescher Kierch, sech do anzemëschen, heescht et weider am Schreiwes.