An Däitschland gëtt nach ëmmer um Budgetsprojet fir d‘nächst Joer geschafft. Wéinst dem Milliarde-Lach, dat elo an der Suite vun engem Geriichtsurteel entstanen ass, musse sech SPD, FDP an Die Grünen bannent kuerzer Zäit op ee Budget eenegen.
Ronn 17 Milliarden Euro mussen SPD, FDP a Bündnis90/Die Grünen opdreiwen, fir d’Lach am Budget fir d’Joer 2024 opzefëllen. Wéinst enger Decisioun vum Karlsruher Verfassungsgeriicht ass d’Ampelregierung an d’Laberente geroden. Elo kéinte justement sozial Mesuren déi éischt Affer vun der däitscher Budgetskris ginn.
Ëmstriddenen si virun allem Kierzunge bei de Sozialdepensen. Observateuren no wieren d‘Gespréicher an enger decisiver Phas.
De Wirtschaftsminister Robert Habeck huet gëschter Owend seng geplangte Rees op Weltklimakonferenz zu Dubai missen ofsoen.
An der Sendung Anne Will huet den Habeck sech gëschter Owend optimistesch gewisen. Et wier awer net ze verhënneren, datt et „zu Zoumuddunge“ kéim kommen.
Den nächsten Debat iwwer den däitsche Budget steet Mëtt Dezember am Bundestag um Programm.
An Zesummenaarbecht mat Euranet Plus, dem gréissten europäesche Radio-Reseau fir EU-Aktualitéit.