Dëse Gesetzestext soll de Kader erweideren, an deem Dokteschgesellschaften da kënne kleng chirurgesch Agrëffer ausserhalb vun de Spideeler – also an ambulante Strukturen –duerchféieren. Nieft de klengen Agrëffer un Aen an Haut, déi schonn definéiert waren, kommen elo och kleng Agrëffer an der Urologie oder um Bauchfell dobäi (zum Beispill Hernien). Extern Promoteure sinn a béide Gesetzestexter ausgeschloss.
Lien zum Spidol weiderhin néideg
D'Strukture sollen op Initiativ vun den Doktere generéiert ginn, déi sech an enger Associatioun oder enger Societéit zesummeschléissen, esou d'Ministesch.
"Déi Geneemegungen, déi si kréien, ënnerläit deene selwechte Bedingunge wéi d'Sites supplémentaires vun de Spideeler. D'Doktere maachen eng Demande um Ministère. Et gëtt Avise gefrot, et gëtt eng Autorisatioun vum Minister, et gëtt eng Konventioun mat der CNS."
D’Ministesch huet betount, datt et keng Antennen vu Spideeler solle sinn, allerdéngs brauch all Struktur ee Lien zu engem Spidol fir d’Continuité des soins ze garantéieren.
Personal fält ënner bestoende Kollektivvertrag
Et wier deemno keng Privatisatioun vum Gesondheetssystem, seet d'Ministesch.
"Mir schafen ee gesetzleche Kader, an deem privat an autonom ambulant Strukture kënnen entstoen, mat klore Reegelen, héije Qualifikatiounsufuerderungen, héije Qualitéitsufuerderungen an enger garantéierter continuité des soins. Si sinn eegestänneg. Mee net ausserhalb vum ganze System."
De Finanzement fir déi Strukture soll iwwer déi nämmlecht Forfaite wéi fir d’Spideeler funktionéieren.
Wat d'Personal fir déi Strukturen ugeet, esou géifen déi alleguerten ënner de Kollektivvertrag vun der Spidolsfederatioun FHL falen. Dozou gehéiert also ënner anerem Fleegepersonal, medizinesch-technescht Personal a Verwaltungsmataarbechter:innen.
"Fir eis ass kloer, d'Gesetz dierf net op d'Käschte vum Personal goen. Dofir gehéiert zu dëse Strukturen och e kloren an attraktive Kader."
De Gesetzesprojet gesäit och vir, déi sougenannt Réseaux de compétences auszebauen. Nei spzialiséiert Netzwierker solle fir Long Covid, Endometrios, Problemer ronderëm d'Menopause an Neuroentwécklungsstéierunge bei Kanner a Jonke geschafe ginn, esou d'Gesondheetsministesch.
Oppositioun ass virsiichteg optimistesch
De Gesetzesprojet gouf och an der zoustänneger Chamberkommissioun presentéiert. D’Deputéiert esouwuel vun der Oppositioun wéi och vum Koalitiounspartner DP weise sech virsiichteg optimistesch – et géifen awer nach eng Rei Froen op bleiwen.
Déi gréng hu sech an enger éischter Reaktioun zefridde gewise mam Gesetzesprojet, virun allem iwwer d’Fro vum Personal an der Continuité des soins. De Kollektivvertrag vun der Spidolsfederatioun FHL soll nämlech an Zukunft an allen ambulante Strukture gräifen. An och de Lien zum Spidol, dee soll bestoe bleiwen, wier wichteg, esou déi gréng Deputéiert Djuna Bernard no der Kommissioun.
“A priori, elo mol op deen éischte Bléck, mir kruten haut eng éischt Presentatioun, sinn déi Saach emol ginn. Dat si fir eis déi allerwichtegst Prämissen. Duerno sinn eng ganz Rei Detailfroen, déi och am enke Lien si mam Gesetz ronderëm d'Dokteschgesellschaften, déi se nach muss erklären.”
D'DP-Deputéiert Carole Hartmann huet an der Sëtzung mat der Ministesch d’Fro gestallt wisou d’Spidolsgesetz geännert soll ginn am Plaz ee ganz neit Gesetz fir den Extrahospitalier opzemaachen.
Dat géif der DP no, d’Medezin méi no un de Patient bréngen an den Droit d’initiative vun den Doktere stäerken, esou d’Carole Hartmann.
“D'Ministesch huet do kloer drop geäntwert, dass hei de Choix vun der Loi hospitalière geholl ginn ass, fir méi séier kënne weiderzekommen, dat heescht fir méi séier kënnen Ambulanzstrukturen ze maachen, déi awer déi selwecht Offer wéi am Spidol erméiglechen, mee dass eng Loi extra hospitalière net vum Dësch ass.”
De Gesetzestext gesäit iwwerdeems d’Schafung vun neie Kompetenzzentre vir, dat ënner anerem fir komplex Krankheetsbiller wéi Long Covid oder Endometrios.
