Am Kader vum Projet "Schwätz mat!“ konnten d’Biergerinnen a Bierger tëscht Oktober a Dezember zejoert hier Iddien online areechen.
Iwwer 2.000 Beiträg goufen analyséiert. D’Diskussioun huet sech hei haaptsächlech ëm Gerechtegkeet, Nohaltegkeet an d’Upassungsfäegkeet vum System gedréit. Dacks goufen eng Erhéijung vun der Mindestpensioun, eng Deckelung vun héije Renten an alternativ Finanzéierungsmodeller gefuerdert. Och d’Vereenheetlechung vun de Pensiounssystemer fir den ëffentlechen a private Secteur a flexibel Iwwergangsmodeller beim Pensiounsalter stoungen am Mëttelpunkt.
An der nächster Phase solle vu Februar un Dialoger tëschent Experten a Bierger stattfannen. Mat dësem Projet erhofft sech de Ministère eng Basis fir eventuell Reformmesuren.