Am Schreiwes vum Thierry Breton, wat hien op der Platform “X” publizéiert huet, reprochéiert hien der Kommissiounspresidentin, si hätt hien hannergaangen. De Fransous war vum Emmanuel Macron als Kandidat fir déi nächst Kommissioun genannt ginn. D'Ursula von der Leyen kréich elo een anere Kandidat proposéiert, sou den Thierry Breton.
Muer soll d’Kommissiounspresidentin Ursula von der Leyen, déi jo een zweet Mandat un der Spëtzt vun der Europäescher Kommissioun ustrieft, hir nei Ekippe presentéieren. Deen Exercice schéngt duerch dës Demissioun awer elo nees méi komplizéiert ze ginn.
Krämpes, eng nei Ekipp zesummenzestellen
D’Demissioun vum Thierry Breton ass - dat kann ee soen - een Eclat zu Bréissel. D’Kommissiounspresidentin huet Krämpes hir Ekippen zesummenzestellen, an elo erhieft ee vun deenen, déi als séchere Kandidat gegollt hunn, schwéier Kritik un der Kommissiounscheffin.
Den Emmanual Macron hat de 29. Juli den aktuellen EU-Kommissär fir de Bannemarché als Kandidat fir déi nächst Kommissioun proposéiert. D’Ursula von der Leyen hat zwar vun de Länner zwee Nimm, also eng Fra an ee Mann gefrot, dobäi awer betount, datt dat just fir Länner gëllt, déi nei Kandidaten nennen, net also fir déi, déi deen nämmlechten an d’Course schécken.
I would like to express my deepest gratitude to my colleagues in the College, Commission services, MEPs, Member States, and my team.
— Thierry Breton (@ThierryBreton) September 16, 2024
Together, we have worked tirelessly to advance an ambitious EU agenda.
It has been an honour & privilege to serve the common European interest🇪🇺 pic.twitter.com/wQ4eeHUnYu
Trotzdeem hätt si, sou den Thierry Breton a sengem Bréif, de franséische President gefrot, dee Kandidat zeréckzezéien, an d’Ursula von der Leyen hätt Frankräich am Géigenzuch ee méi wichtege Portfolio offréiert.
Emmanuel Macron proposéiert de Stéphane Séjourné
Si hätt dat gemaach, ouni mat him Récksprooch ze halen. Dës nei Entwécklung wier eng weider Preuve dofir, datt een hir Gouvernance a Fro stelle kann, sou de Fransous virun un d’Adresse vun der Ursula von der Leyen. Dowéinst kéint hien net weider EU-Kommissär sinn a géif mat “effet immédiat” demissionéieren.
🚨Breaking news:
— Thierry Breton (@ThierryBreton) September 16, 2024
My official portrait for the next European Commission term ⤵️ pic.twitter.com/BolWcdYiPU
Eng Demissioun, déi elo een Dag virun der geplangter Presentatioun vun där neier Ekipp kënnt. Eng Annonce, déi souwisou schonn net méi als sécher gegollt huet, well Slowenien nach keng nei Kandidatin genannt huet. Dat nodeems d’Kommissiounscheffin verschiddene Medien no och hei den éischte scho confirméierte Kandidat net wollt an een neie Numm gefrot hat.
Kuerz no der Demissioun vum Thierry Breton huet den Emmanuel Macron dunn annoncéiert, de Stéphane Séjourné als EU-Kommissär ze proposéieren. De Stéphane Séjourné ass zënter Januar 2024 franséischen Ausseminister a Generalsekretär vum Macron senger Partei "En marche".