De Xavier Bettel kann haut awer nëmme kuerz dobäi sinn, well hien aner Verflichtungen huet, esou säi Porte-parole.
De Xavier Bettel war géint d'Verleeë vun der Reunioun op Bréissel
"Ech fueren op Budapest." Dat hat de Lëtzebuerger Chefdiplomat Mëtt Juli gesot. D'Iddi vun engem Boykott vu Sitzungen, déi déi ungaresch EU-Presidence zu Budapest organiséiert, hat hien auslännesche Medie géintiwwer als "Schwachsinn" bezeechent. Zu Lëtzebuerg sot hien:
"Ech hu léiwer mir ginn dohinner a mir soen dem Ungar, wat mir dovun halen, wéi datt mir hien als Victime dohinner stellen. Léiwer ee gudden Echange, wéi eng Fuite."
Den Echange gouf och net evitéiert. En huet op enger Reunioun am Juli stattfonnt.
Borrell: Ungarescht Behuele muss Konsequenzen hunn
D'EU-Länner ware sech awer net eens, wéi ee sollt op dem Viktor Orban seng Visitt beim russesche President Putin an op seng Aussoe reagéieren. D'Decisioun louch zum Schluss beim Baussebeoptraagte vun der EU an deen huet net op Budapest, mee op Bréissel invitéiert.
"Et ass eng symbolesch Aktioun", esou de Josep Borrell. Vun der Iddi vun engem Boykott huet hie sech distanzéiert, mee de Fait, datt déi ungaresch Representanten, den Ausseminister inclus, ëmmer nees net loyal waren an d'EU als Krichspartei bezeechnen, misst Konsequenzen hunn. Och wann dat symbolesch formell Konsequenze sinn, "well a Wierklechkeet näischt geschéie wäert", esou de Spuenier.
Ukrain an Noen Osten am Mëttelpunkt
Déi ungaresch EU-Presidence huet de Schratt "kannereg" genannt - den ungareschen Ausseminister Peter Szijarto wäert awer, wéi eis d'Spriecher vun der EU-Botschaft confirméiert hunn, un der Reunioun haut deelhuelen. Um Programm steet een Echange iwwer déi aktuell aussepolitesch Sujeten - virop d'Ukrain an den Noen Osten.