Haut huet den Oligarch um Europäesche Geriichtshaff an 1. Instanz verluer. An den Ae vun den europäesche Riichter:inne war den EU-Conseil nämlech kompetent, fir Obligatiounen anzeféieren, op Grond vun deene Leit, déi op enger Sanktiounslëscht stinn. Och dem Mikhail Fridman säin Numm ass am Juli 2022 op déi EU-Sanktiounslëscht komm.
D’Persounen, déi dorop stoungen, hate bis September 2022 Zäit hir Fongen ze deklaréieren a mat den zoustännegen Autoritéiten zesummeschaffen. Sollt dat net geschéien, géif dat gläichgesat gi mat engem Ëmgoe vun den EU-Mesuren. Ënner anerem de Mikhail Fridman hat den Europäesche Geriichtshaff saiséiert, fir déi Obligatiounen annuléieren ze loossen.
Fridman huet Prodédure d'arbitrage ugefrot
Déi éischt Riichteren um Kierchbierg hunn haut awer dem Oligarch säi Recours zréckgewisen. D’europäescht Recht géif et dem EU-Conseil erlaben, restriktiv Mesuren z’ergräifen, fir dass déi an all Memberland kéinten ëmgesat ginn. Dozou géifen och sou Obligatioune gehéieren.
De Premier Luc Frieden hat d’lescht Woch d’Klo vum Mikhail Fridman géint Lëtzebuerg public gemaach. Mëtt August hätt den Oligarch eng Procédure d’arbitrage ugefrot, virun engem Schidsgeriich. Zu deem Arbitrage géif et wuel an Asien kommen. De Grand-Duché gëtt an dësem Rechtssträit, deen e puer Joren dauere kéint, vun der Affekotenetüd A&O Shearman vertrueden.