Richtung22 hätt d‘Maueren am Gebai "bësse" beschiedegt, d‘Schlässer ausgetosch an d‘gemeinsam Kichen net gutt ënnerhal. Esou d‘Virwërf vum Direkter vun der FrEsch ASBL, de Loïc Clairet. Dowéinst wéilt een d‘Partenariat net viru féieren. Richtung22 hätt bis Enn dës Mounts Zäit, aus dem Bâtiment 4 erauszeplënneren.
Virwërf wiere schonn aus dem Wee geraumt ginn
En Dënschdeg hätt een de Bréif vu FrEsch kritt, seet d‘Michelle vu Richtung22, si wëll net, datt hiren Nonumm genannt gëtt. Et misst een nach préiwen, wéi d‘Kollektiv sech dogéint wiere kann, et wier een och zimmlech iwwerrascht gewiescht vum Bréif, seet si. Et hätt am Fong een neie Moment ginn an der Mediatioun an deems ee sech zesummen un een Dësch gesat hätt. D'Virwërf déi de Loïc Clairet gemaach huet, wieren do aus dem Wee geraumt ginn, seet d‘Michelle.
"Dës Ënnerstellungen, an dat hunn d'CA-Membere vis-à-vis vun eis och an der Mediatioun zouginn, goufen hinnen nämlech vum nämmlechte Mann iwwerliwwert, deen d'lescht Joer an eise Büro agebrach ass an eise Banner verbrannt huet, op dee mir de Pim Knaff kritiséiert hunn."
"Eist politescht Engagement ass de Problem"
Konkret zum Reproche, datt si Schlässer ausgetosch hätten, seet d‘Michelle iwwerdeems, datt de Schlëssel an enger Dier ofgebrach ass. Et hätt een de Facilitateur technique per Mail dorop higewise kritt, awer ni eng Äntwert kritt. Et hätt een d‘Schlass du selwer ausgetosch, an dem Facilitateur technique de Schlëssel ginn.
Onofhängeg dovu wieren d‘Kontrakter vu FrEsch, déi op ee Joer ginn, problematesch, esou d‘Michelle. Domat géif FrEsch sech d‘Recht huelen all Moment ze kënnege wéi si wëllen. Fir Richtung22 wier kloer, datt hirt politescht Engagement zu Esch de Problem ass. Dat hätt een och vu politesch Responsabelen aus dem Escher Kulturbetrib bestätegt kritt.
