Max Tholl (Paräis)
En éischte Virgeschmaach op de Regierungsprogramm huet de Michel Barnier de Sonndeg den Owend geliwwert an och direkt kloergestallt, datt seng Regierung an de President Macron net an enger Co-Habitation wieren. Schliisslech wier dem President seng Partei jo och déi stäerkste Kraaft an der Regierung, dowéinst wäert et dem Barnier no hei keng Problemer ginn.
Attal wëllt Garantie, datt Fräiheeten net begrenzt ginn
Fir e wéineg Tensiounen hat awer d'Fuerderung vum Barnier sengem Virgänger a Chef vum Grupp Renaissance, de Gabriel Attal, gesuergt. Wéinst verschiddene konservative Ministeren a Ministerinnen, déi sech an der Vergaangenheet zum Beispill dogéint ausgeschwat haten, d'Recht op Ofdreiwung an d'Konstitutioun opzehuelen oder géint den homosexuelle Mariage waren, wëllt den Attal eng Garantie vum Barnier, datt dës Fräiheeten net begrenzt ginn, an déi huet de Premier och onmëssverständlech ginn.
Kompromëssbereetschaft muss nach geléiert ginn
Genee esou däitlech war och säi Verspriechen, d'Steieren net grondsätzlech ze erhéijen. Och wëllt de Barnier sech Zäit huele fir mat de Sozialpartner zesummen déi ëmstridde Pensiounsreform unzepassen. Op seng feelend Majoritéit ugeschwat sot de Barnier, et géif kee Wee un enger breeder Zesummenaarbecht am Parlament laanschtféieren. Dës Kompromëssbereetschaft misst awer a Frankräich nach geléiert ginn.
Ob d'Oppositiounsparteien och sou kompromëssbereet wäerte sinn, ass schwéier ze soen. De Verhandlungsspillraum ass jiddefalls kleng. De Barnier wäert warscheinlech Ouverturë maachen. Wat d'Migratiounspolitik ugeet éischter an d'Richtung vum RN a wat d'Pensiounsreform betrëfft an d'Richtung vun der Gauche. Woubäi et der Gauche net ëm eng Verbesserung vun der Pensiounsreform geet, mee en zeréckzéien.