88 mol waren d’Klacke vun der Notre Dame zu Paräis no der Annonce vum Doud ze héieren. Ee Klackeschlag fir all Liewensjoer vum Poopst. Den Eiffeltuerm ass gëschter Owend däischter bliwwen an och soss gouf op ville Plazen am Land un de Verstuerwene geduecht.
Däitlech sozial Dimensioun
De Kardinol Jean-Marc Aveline, Äerzbëschof vu Marseille a potentielle Kandidat op d’Nofolleg, sot de Poopst François wier eng paternel Perséinlechkeet gewiescht, exigent mee ëmmer mat engem oppenen Ouer.
Och d’Politik huet dem Poopst geduecht. De President Emmanuel Macron hat um Méindeg vu Mayotte aus gesot, de Poopst hätt sech ëmmer fir déi Schwächsten agesat
Dem Macron säi Virgänger, de François Hollande, sot de Poopst hätt sengem Pontifikat eng däitlech sozial Dimensioun ginn. Hien hätt sech och dofir agesat, datt de Vatikan méi aktiv gëtt géint de sexuelle Mëssbrauch an der kathoulescher Kierch.
Klimaschutz besser verstan, ewéi Politiker
Déi lénk Politiker a Politikerinnen hu virun allem ervirgehuewen, datt de Poopst sech dacks fir Flüchtlingen an de Fridden an der Welt staark gemaach huet. D’Lénkspartei La France Insoumise huet hien als Verfechter vum Fridden a Palästina bezeechent. D’Ekologistin Marine Tondelier sot, hien hätt de Klimaschutz besser verstanen, ewéi vill Politiker.
Beim rietsextremen RN war een awer méi knapp bei den Hommagen. Si hunn de Poopst zu Liefzäiten als "Immigrationiste" bezeechent. D’Marine Le Pen huet just e puer knapp Wierder, awer keng Wierdegung fir de Poopst fonnt.
