Wann ee Fluch ausfällt, hätten d'Passagéier e Recht drop, fir entweder hir Suen zeréck ze kréien, oder en neie Fluch ugebueden ze kréien, seet d’Konsumenteschutzministerin Martine Hansen. An dësem Fall hätten d'Fluchgesellschaften awer keng Schold an dofir "kënnen d’Passagéier an dësem Fall keng zousätzlech Entschiedegung kréien".
Nach net sou vill Nofro no der Impfung géint d'Blozongekrankheet
Fir d’Blozongekrankheet an de Grëff ze kréien, sollen d’Béischte geimpft ginn, esou den Appell vun der Landwirtschaftsministerin Martine Hansen. Och wa scho krank Déieren an engem Stall sinn, da soll awer geimpft ginn. Der Ministerin no, wiere genuch Impfdosissen do. D’Nofro wier awer nach net esou staark, wéi een dat gehofft hat. D’Ministerin huet awer och confirméiert, datt d’Impfunge kee komplette Schutz géife bidden.
Wéinst dëser viraler Infektiounskrankheet - virun allem bei Schof a bei Randbéischten - gëtt de Moment iwwer zousätzlech staatlech Hëllefe fir d’Déierebesëtzer diskutéiert.
Warscheinlech keng zousätzlech staatlech Hëllef
De Lëtzebuerger Staat géif den Impfstoff bezuelen a 65 Prozent bei méiglech Assurance bäileeën.
"Fir de Recht si mir am gaange mat analyséieren, ob mir trotz där Assurance kënnen eng Bäihëllef ginn, wou et awer éischter esou ausgesäit, wéi wa mir dat nit kënne maachen."
D’Veterinärinspektioun hätt iwwerdeems um Radar, datt verschidde Wëlddéiere vun der Blozongekrankheet betraff sinn, esou d’Ministerin. D’Jeeër solle geschwënn informéiert ginn, wat an dëse Fäll ze maache wier. Wëlddéiere kéinten net geimpft ginn, sou d’Martine Hansen.
"De Christophe Hansen wier ee gudde Kommissär"
"Mir brauchen ee staarke Landwirtschaftskommissär an de Christophe Hansen wier do bestëmmt gutt op der Plaz", esou huet d’Landwirtschaftsministerin Martine Hansen de Moien am 100,7-Interview d’Fro beäntwert, op si sech freeë géif, wann hire Cousin, den CSV-Politiker Christophe Hansen den nächsten EU-Landwirtschaftskommissär géif ginn. Der Martine Hansen no, wier de Christophe Hansen awer och an anere Beräicher ganz gutt op der Plaz.