Zanterhier hätt ee siwen Dossieren opgemaach an zwee bis véier Appeller den Dag, woubäi den Trend vun den Appeller eropgeet, seet d'Mediatrice Corinne Weis am 100,7-Interview. An der Altersmediatioun géife sech ganz vill verschidde Froen a Konflikter weisen, mat deenen d'Leit sech un de SIMPA wende kënnen.
"Dat kënne Froe wéi Autonomieverloscht sinn, d'Organisatioun vun der Fleeg, finanziell Froen: Wéi organiséieren ech meng Ierfschaft zum Beispill."
Dat awer ouni "d'Prinzippie vun der Mediatioun" a Fro ze stellen, also d'Neutralitéit, Fräiwëllegkeet a Vertraulechkeet, esou nach d'Corinne Weis.
De Mediatiounsservice ass zoustänneg fir all Froen a Konflikter, bei deene Gestionnairen am Spill sinn, déi vum Familljeministère agreéiert sinn, betount d'Corinne Weis. Et géif een iwwerdeems all Joer ee Rapport mat Statistiken a Recommandatiounen un de Familljeministère maachen.