Do kéint hie wuel méi Leit ëmbrénge wéi bei engem Amoklaf an den USA am Joer 2007, deen 32 Leit net iwwerlieft haten. Virdru géif hie säi Papp dout maachen an e puer Minutte virun der Attack am Lycée eng Foto posten.
Police vum FBI opmierksam gemaach ginn
E Polizist sot aus, et wier een am August 2022 vum FBI iwwer dee Post op Discord informéiert ginn. Den Auteur hat geschriwwen, hie wéilt sech am Oktober, fir säin 18. Gebuertsdag, Waffe kafen, fir am Abrëll 2023 de Massaker vu Columbine am US-Staat Colorado nozemaachen, um Joresdag dovun. 1999 haten do zwee Schüler 12 anerer an e Proff erschoss.
Well de Beschëllegte konkret Informatiounen hannerlooss hat, wier hie séier identifizéiert gewiescht. Zu deem Zäitpunkt war hien awer net méi am Lallenger, mee am Bouneweger Lycée technique.
"Et wier keng onméiglech Saach gewiescht"
Wéi de jonke Mann Ufank 2023 du geschriwwen huet, hie wier op der Sich no Waffen an hätt d'Moyenen dofir, koum et kuerz dorop zum Zougrëff. Am Februar koum et zur Perquisitioun beim Ugekloten doheem zu Diddenuewen. Dräi Deeg war hien a Garde à vue. A Frankräich wéi och zu Lëtzebuerg war hie polizeilech net bekannt.
No der Garde à vue gouf hien an de Grand-Duché bruecht. Der Police sot hien, d'Attentatspläng wieren net reell gewiescht. A sengem Tagebuch stoung awer och, hie wéilt Revanche huele fir dat, wat iwwer 4 Joer mat him geschitt wier, esou den Enquêteur.
De jonke Mann selwer hat um Ufank vun der Sëtzung erkläert, hie wier ganz rose gewiescht, mat ville Leit. Et hätt awer ni eng Virbereedung gi fir eppes ze maachen. Allerdéngs sot hien och: "Hätt ech mir dat an de Kapp gesat, da wier et keng onméiglech Saach gewiescht."
De Mëttwochmoie gëtt dëse Prozess ofgeschloss.
