D'Koalitioun huet déi nächst Schrëtt geplangt, fir herno de Fridden an der Ukrain ze garantéieren.
No der Reunioun, un där ënner anerem den ukrainesche President Wolodymyr Selenskyj, den däitsche Kanzler Friedrich Merz an och de brittesche Premier Keir Starmer deelgeholl hunn, huet ee sech zefridde gewise mat de Resultater.
Nei Koalitioun fir Loftverteidegung
Néng europäesch Länner an d'Ukrain hunn zum Beispill eng Koalitioun forméiert, fir méi defensiv antiballistesch Kapazitéiten an Europa ze entwéckelen. De Wolodymyr Selenskyj sot, jee méi Mëttel d'Ukrain hätt fir russesch Rakéiten ofzewieren, desto gréisser d'Chance, datt de russesche President Wladimir Putin sech op Friddensverhandlungen aléisst.
Den Emmanuel Macron huet och annoncéiert, datt een an de leschte Méint intensiv un der Planifikatioun fir Friddenstruppe geschafft huet, déi agesat solle ginn, wann de Fridde geséchert ass. An den nächste Méint sollen dës schonn an den Nopeschlänner vun der Ukrain Trainingsmanöveren absolvéieren.
Friddenstruppen a Rafale-Kampffligeren
Iwwerdeems huet de franséische President och ugekënnegt, datt Frankräich an d'Ukrain eng Feuille de route ënnerzeechent hunn, déi virgesäit, datt d'Ukrain ënner anerem 16 franséisch Kampffligere vum Typ Rafale keeft, déi fréistens 2028 zum Asaz komme sollen. De Sommet gëschter war fir de Macron och en Zeeche vum europäeschen "réveil stratégique". Scho bei senger traditioneller Usproch un d'Militär gëschter um Dag virun Nationalfeierdag sot hien, et kéint een d'Verteidegung nëmmen europäesch denken.
Haut huelen dann och 500 Zaldoten aus de Länner vun der Koalitioun vun de Wëllegen un der Militärparad op de Champs-Elysées deel.
