Trotz Differenze sollen d’USA an Europa weider zesummeschaffen, dee Wonsch hunn de Premier Luc Frieden an den Ausseminister Xavier Bettel.
En „historesche Frënd an Alliéierten“
Europa dierft sech näischt diktéiere loossen, huet de Xavier Bettel um NATO-Ausseministertreffe gewarnt, soss géif ee riskéieren “gefriess” ze ginn. Elo wier et wichteg ze verhandelen.
“Mir sinn net déi, déi den éischte Schratt an déi falsch Richtung maachen. Mir sinn déi, déi au contraire reagéieren."
Och de Luc Frieden setzt am 100,7-Interview op Dialog. Amerika géif en „historesche Frënd an Alliéierten“ bleiwen, mee d’EU misst mat Mesurë reagéieren, wann d’Gespréicher tëschent der EU-Kommissioun a Washington näischt bréngen. De Premier huet sech awer relativ optimistesch gewisen. Et sollt een dem Dialog an de Verhandlungen ëmmer eng Chance ginn, esou de Luc Frieden.
“Si hunn d'Tariffer annoncéiert an da sinn si a Verhandlunge gaangen. An dofir mengen ech, kéint dat och dës Kéier dee Wee sinn, dee ka villäicht zu enger dach nach um Enn uerdentlecher Solutioun féieren.”
Liwwerkettegesetz dierf net a Gefor kommen
Der Deputéiert vun déi gréng Joëlle Welfring no, wier et elo wichteg ze verhënneren, datt déi amerikanesch Regierung probéiert eenzel Deale mat verschiddenen EU-Memberstaaten auszehandelen.
Dat europäescht Liwwerkettegesetz dierft duerch dem Donald Trump seng Politik net a Gefor bruecht ginn, sou nach d’Joëlle Welfring.
Net "iwwer dramatiséieren"
Den LSAP-Deputéierte Claude Haagen fuerdert hei méi Onofhängegkeet op europäeschem Niveau. Bei Onstëmmegkeeten innerhalb vun Europa par rapport zu enger Verhandlungsstrategie, wier Europa an de Gespréicher mat den USA vill ze vill schwaach, sou nach de Claude Haagen vun der LSAP.
Den ADR-Deputéierten Tom Weidig reagéiert zeréckhalend. Effektiv hätt den Donald Trump an der Vergaangenheet schonn Taxen als Drockmëttel agefouert an dann nees deelweis zeréckgeholl, dofir dierft een dat elo net iwwer dramatiséieren, esou den Tom Weidig an engem schrëftleche Statement op eis Nofro hin.
