Keen anert Sportsevenement zitt hei am Land esou vill Leit u wéi den Nuetsmarathon. E fuerdert eng Risen Organisatioun: Méi wéi 16.000 Leeferinnen a Leefer ginn un den Depart. Een neie Rekord, deen dem Erich François awer net duergeet. Hie strieft un, an net allze laanger Zukunft eng 20.000 bis 25.000 Leit un de Start ze kréien.
Hien ass zouversiichtlech, datt dat klappt. Wärend der Pandemie hätten nämlech vill Leit, och méi jonker, ugefaangen, lafen ze goen. An dat wiere lauter potentiell Marathonleefer vu muer.
D'Stëmmung entsteet doduerch, datt et nuets ass
All gréisser Stad organiséiert jo hire Marathon. Wat deen zu Lëtzebuerg sou besonnesch mécht, ass d'Stëmmung, déi doduerch entsteet, datt owes gelaf gëtt: d‘Beliichtung an d‘Spectateure maachen do villes aus.
Och de Parcours selwer an d‘Kuliss duerch d‘Stad géif vu ville Leefer a Leeferinne gelueft ginn, erkläert den Erich François.
Fir de Marathon sinn iwwer 1.000 Fräiwëlleger am Asaz. Ouni déi géif et net goen, betount den Erich François.