D’Weltgesondheetsorgansatioun hat fir den Donneschdeg an ee Freideg eng Online-Konferenz aberuff, fir sech mat den zoustännegen Autoritéiten iwwert déi aktuell Entwécklungen ze beroden. D’WHO huet ee Plang op d’Been gestallt fir deene Länner ze hëllefen, déi am meeschte vun Mpox betraff sinn. Well et net genuch Impfstoff gëtt, wäerten als alleréischt déi Persoune mat héijem Risiko an d’Personal aus dem Gesondheetswiesen un d’Rei kommen.
Spendenopruff vun der EU-Gesondheets-Kommissärin
I have written to 🇪🇺 Health Ministers regarding plans to donate #mpox vaccines & therapeutics.
— Stella Kyriakides (@SKyriakidesEU) August 23, 2024
➡️🌍 solidarity is key to facing global health threats.
We count on Member States to support our African partners in managing the outbreak.@EU_Commission stands ready to coordinate. pic.twitter.com/5pfoYEf5kS
D’EU hat am Numm vun der Gesondheets-Kommissärin dozou opgeruff, Done vun Impfdosissen ze maachen. Bis dëse Weekend sollten d’Länner hir matdeelen, ob a wéi vill Vaccin si spende wëllen, sou d’Stella Kyriakides an engem Bréif un d’Gesondheetsministere vun de 27 EU-Länner, an deem si och eng Koordinatioun vu Bréissel aus offréiert huet.
Wat genee dobäi erauskoum, schéngt elo, een Dag ier déi Deadline ofleeft, net esou kloer ze sinn.
Et wier een am Kontakt mat de Memberlänner an d’Hera, d’EU-Agence fir Krisepreventioun, wier och ageschalt, verséchert den zoustännege Porte-Parole vun der Kommissioun. Hie kéint keng Detailer iwwert Spende vun de Memberstaaten presentéieren, sou den Stefan de Keersmaecker op eis Nofro.
Klappt EU-Koordinatioun?
Verschidde Länner ewéi Spuenien oder Däitschland hu schonn annoncéiert, Donen am grousse Stil ze maachen.
Et kéint also sinn, datt dat laanscht d’Kommissioun leeft an d’EU - just datt sollt evitéiert ginn, well ee Léieren aus der Covid-Pandemie zéie wollt, sou och nach de Kommissiounsspriecher, allerdéngs betount hien och:
„Mais n’oublions pas que les décisiouns concernant les vaccins sont des décisions qui relèvent de la compétence nationale.“
Lëtzebuerg mécht mat, wéi vill Dosissen akaaft a gespent ginn, ass nach net gewosst
D’Europäesch Unioun huet ee Kaderkontrakt mam Hiersteller “Bavarian Nordic”, d’Länner hunn d’Méiglechkeet doriwwer anzekafen an déi Dosissen dann ze spenden.
Lëtzebuerg wëllt dovu Gebrauch maachen. Een Deel vun deene Vaccinen, déi nei akaaft gi solle gespent ginn, huet eis de Gesondheetsministère matgedeelt. Wéi vill genee, gouf net preziséiert. Et géif dovun ofhänken, wéivill Impfstoff Lëtzebuerg am Ganze kréie kann, huet et op eis Nofro geheescht.
Deem Kader-Kontrakt no kënnen d’EU-Länner bis zu zwou Milliarden Impfdosissen akafen, dat hat d’EU-Kommissioun matgedeelt.
An Zesummenaarbecht mat Euranet Plus, deem gréissten europäesche Radio-Reseau fir EU-Aktualitéit.