Ouni Tabu sollt hei verhandelt ginn, hat de Premier François Bayrou Mëtt Januar nach annoncéiert an domadder och de Wee fir Diskussioune fir eng Erofsetzung vum Pensiounsalter op 62 Joer fräigemaach.
Staark Reaktioune vun de Sozialpartner
Um Sonndeg huet hien awer géigeniwwer Franceinfo esou eng Upassung quasi ausgeschloss. D’Reaktioune vun de Sozialpartner hunn net laang op sech waarde gelooss.
D’CGT sot et wier e Verrot an e skandaléist Verhale vum Premier. Force ouvrière sot d’Konklave wier just e Manöver gewiescht, fir engem Mësstrauensvote ze entgoen an huet doropshin erkläert net méi un de Verhandlungen deelzehuelen. Déi aner Gewerkschafte fuerderen elo méi genee Explikatioune vum Premier a wëllen den Owend beroden, wéi et elo soll weidergoen.
Regierung steet hannert Bayrou
D’Oppositiounsparteie geheien dem Bayrou fir e Ligener ze sinn, an d’Gewerkschaften ze iwwergoen. D’Regierung wéist Zesummenhalt, d’Ministesch fir d’Comptes Publics, d’Amélie de Montchalin, sot um Méindegmoien op Europe 1, datt eng Erofsetzung vum Pensiounsalter net realistesch ass.
Och déi aktuell Educatiounsministesch a fréier Premierministesch Elisabeth Borne sot et géif virun allem dorëms goen, de Pensiounssystem nees an d’Gläichgewiicht ze bréngen.
Eenzeg de Wirtschaftsminister Eric Lombard hat dem Premier deelweis widdersprach a gesot, et wier un de Sozialpartner ze decidéieren. Déi nächst Reunioun vun der Konklav ass fir dëse Mëttwoch geplangt.
