Den US-President suivéiert d’Entwécklungen an der Regioun op senger Télé bei sech doheem a senger Villa Mar-a-Lago a Florida. Dat mellen international Medienagencen. Hien fuerdert d'Mënschen am Iran per Video op sech géint de Regimm ze stellen.
"Gudden Zuch vum Trump d'Schold ofzeginn"
De Geo-Politik-Expert Klemens Fischer vun der Uni Köln hält et awer fir onwarscheinlech, datt eng Revolutioun vu bausse kéint geléngen.
„Das ist aber auch nichts Neues an der Kriegsgeschichte, von oben hat man noch nie eine Bevölkerung wirklich in den Widerstand hineinbombardiert, da sieht man in Japan, auch in Deutschland im Zweiten Weltkrieg. Bevölkerungen sind sehr, sehr schwer von aussen zu motivieren, gegen das Regime aufzutreten, wenn sie nicht sicher sein können, es nachher zu überleben.“
Et wier awer e gudden Zuch vum Donald Trump elo schonn d‘Schold ofzeginn. Wann de Regierungswiessel da scheitert, da wier et net seng Schold mee déi vun der iranescher Bevëlkerung oder déi vun der Oppositioun, esou d'Aschätzung vum Expert Klemens Fischer.
Retour vun der Pahlavi‑Monarchie
Wéi international Medienagencë mellen, géif an de Stroossen vun Teheran, den Doud vum Ajatollah Ali Chamenei deels grouss geféiert ginn. Vill Iraner an Iranerinne géifen hier Hoffnung elo op de Retour der Pahlavi‑Monarchie setzen, déi 1979 duerch d’Islamesch Revolutioun gestierzt gi war. “Dat ass de leschte Kampf, de Pahlavi wäert nees zréck kommen”, dat wier eng vun de Parolen déi bei de Protester am Iran ze héiere wier. Dat mellt déi däitsch Noriichtenagence DPA.
De Jong vum deemolege Schah, Reza Pahlavi, huet sech schonn als potentiellen Interim-Leader presentéiert. Nom Stuerz vu sengem Papp am Joer 1979 war d'Famill an d’Exil an d’USA geflücht.