Am Kader vun der lëtzebuerger EU-Présidence hat d’Équipe vum Mudam sech eppes Besonneges afale gelooss: déi géigesäiteg Aflëss vu Konscht an Technik an der Ausstellung “Eppur si muove” gräifbar ze maachen. Dat ass beim Public excellent ukomm: d’Expo hat iwwert 50’000 Visiteuren. Lo ass déi 10. Mudam-Saison mat 5 neien Ausstellungen agelaut ginn.
Déi visuell Kënschtlerin Fiona Tan presentéiert am Sous-Sol “Geography of time”: eng beweegend Billerrees zu der klenger, perséinlecher, Geschicht an der grousser Histoire.
De Moler/ Holzgraveur/ Sculpteur Damien Deroubaix konfrontéiert 40 eege Wierker mat 15 Originaler vum Picasso.
D'Sarah Oppenheimer huet am zentralen Hall transparent Strukturen opgeriicht, déi eis Perceptioun vun der Architektur op d’Kopp geheien
Den Designer Robert Stadler presentéiert eng Kollektioun vu bizarren, skurillen, Objeten ënnert dem Titel “Quiz”’.
D'Beatrice Gibson bréngt an hirer Videoinstallatioun experimentell Musek mat Économie a Pédagogie a Verbindung.
Déi Geschichten, déi déi 5 Kënschtler –Joergäng 1966 bis 1978 aus allen Häre Länner- aktuell am Mudam erzielen, hunn et a sech. D’Kerstin Thalau am Gespréich mam Mudam-Direkter Enrico Lunghi.
