Hautdesdaags brauch ee kee Waffefanatiker ze sinn, fir dat een oder anert Mëttel ze kennen, mat deem ee Mënsche kann dout maachen. Och d’Kenntnis vu Krichswaffe gehéiert schonn zur Allgemengbildung. Et ginn awer och Waffen, déi een néierens ze kafe kritt an déi alles, mä net technesch funktionéieren. Rieds ass vun der Vergewaltegung. Dës koum a kënnt zënter Joerzéngten an den ënnerschiddlechste Konflikter weltwäit zum Asaz, fir Communautéiten ze verdreiwen, ze splécken an ze traumatiséieren. Wie se iwwerlieft, huet mat engem Crime ze dinn, dee virun allem an der Erënnerung ni verjäert.
E leschte Freide gouf an der Abtei Neimenster d'Vergewaltegung als Krichswaff thematiséiert. Experten aus der Justiz, der Psychologie an der Wëssenschaft hunn diskutéiert an den Documentaire “Mission Rape” gouf gewisen. D’Anne Schaaf huet mat den Experten, an der Réalisatrice vum Film geschwat.
