Deroubaix. Dat kléngt no Adel aus Nordfrankräich. Nord-Pas-de-Calais ass déi richteg Richtung, den Damien ass 1972 zu Lille op d’Welt komm. Mee nobel war säin Alldag net a Konscht e Friemwuert, bis...jo bis zu engem ganz spezielln coup de foudre, ausgeléist duerch dem Picasso säi "Guernica"!
No Konschtétuden zu Saint-Etienne an zu Karlsruhe, huet den Deroubaix laang Joeren zu Berlin gelieft, ier en sech an der Lorraine, an der Glasstad Meisenthal, néiergelooss huet. Berlin wier him um Enn ze deier an ze geleckt gewiescht, sou de franséische Kënschtler. An der 750-Awunner-Gemeng Meisenthal konnt den Damien Deroubaix sech dann och komplett op e spezielle Picasso-Projet aloossen.
Den Ament presentéiert de franséische Kënschtler näämlech parallel 3 Ausstellungen zu Lëtzebuerg. Bis haut den Owend -als Curateur- a béiden Diddelénger Centres d’Art d’Expo “Bastion!”, mat Wierker vu Stroossbuerger Nowuesstalenter; an der Stater Galerie Reding-Nosbaum weist den Deroubaix eegen, nei, Aarbechten an am Mudam war de leschte Freiden de Vernissage vu senger Expo “Picasso et moi”. D’Kerstin Thalau wollt gewuer ginn, wat hannert dësem Titel stécht.
