Op sengem 1990er Album "Ragged Glory" léisst den Neil Young et esou richteg kraachen. Deen deemools 45järege Kanadier vergësst säi sensibelen a poetesche Kascht aus den Enn Sechzeger/ufanks Siwwenzeger a rockt op d'Däiwel komm eraus. Eng gutt Schëpp Garagesound, Gittare-Reverb drop an derwidder, laang Stécker, wou rose gerockt gëtt - heiansdo daucht do och nach deen alen Hippiegeescht op, un deen ee beim Neil Young jorelaang gewinnt war (ë. a. am Lidd "Mansion On The Hill', wou d'Vergaangenheet erëm opblëtzt mat den Zeilen "There's a mansion on the hill / Psychedelic music fills the air / Peace and love live there still / In that mansion on the hill.").
"Ragged Glory" ass en hefteg-rauen Album, voller Kraaft an Energie. E Release, dee wuel d'Etikett grunge net dréit, deen awer gären als Virlag ugesi gëtt fir villes, wat deemools speziell zu Seattle entsteet. Den Neil Young gëtt dann och gär als Godfather of Grunge bezeechent a Bands wéi Nirvana oder Pearl Jam hunn déiwe Respekt virun dem good ol' Neil senge Soundeskapaden.
Et soll een onbedéngt och an e puer Nofollger vu "Ragged Glory" eralauschteren: mat "Harvest Moon" kéiert erëm poséiert an nodenklech Rou beim Museker an, "Sleeps With Angels" ass en emotiounsgeluedenen Hommage un de Kurt Cobain a "Mirrorball" (mat Pearl Jam als backing band!) ass einfach e Must.
Op der Playlëscht:
John Juke Logan - Dancin' On The Edge Of A Razorblade (Juke Rhythm, 1999)
The Dylans - I Hope The Weather Stays Fine (The Dylans, 1991)
The Verve - Lucky Man (Urban Hymns, 1997)
Primal Scream - Movin' On Up (Screamadelica, 1991)
Neil Young & Crazy Horse - Love To Burn (Ragged Glory, 1990)
It's A Beautiful Day - White Bird (It's A Beautiful Day, 1969)
Jefferson Airplane - Good Shepherd (Volunteers, 1969)
Fat Freddy's Drop - The Raft (Dr. Boondigga And The Big BW, 2009)
Digable Planets - Flyin' High In The Brooklyn Sky (Stolen Moments: Red, Hot & Cool, 1994)
Jestofunk - The Ghetto (Love In A Black Dimension, 1995)