Salut Kanner, an ärem Kannereck. Tjo, d'Päischtvakanz ass ewell schonn eriwwer, mee dëse Weekend ass awer eréischt Päischten. Huet dir iech da schonn emol d'Fro gestallt, wat Päischten iwwerhaapt ass. Majo Päischten ass an der Kierch d'Fest vum hellege Geescht, an dat gëtt all Joer mat Päischtsonndeg a Päischtméindeg gefeiert, oder fir et anescht ze soen, den 49. a 50. Dag no Ouschteren
An dofir kann och den Datum vu Päischte vu Joer zu Joer änneren, et muss een dat ëmmer par Rapport zu Ouschtere kucken. Op alle Fall läit Päischten ëmmer tëschent dem 10. Mee an dem 13. Juni. Op Päischte gëtt, der Apostelgeschicht no, drun erënnert, datt 50 Deeg no der Operstéiung vu Jesus, seng Kolleegen am Fong vum Hellege Geescht gesot kruten, si sollen den Evangelium eraus an d'Welt droen.
D'Wonner dobäi, esou gëtt emol gesot, wier datt dem Jesus seng Kolleegen op emol all Sprooche vun der Welt konnte schätzen. Iwwregens den Ausdrock Päischten oder Péngschten, wéi se och deels hei am Land soen, kënnt vum griichesche Wuert "Pentekoste", wat esou vill wéi de 50. Dag heescht.
Päischten ass schonn zanter dem véierte Joerhonnert, als iwwer 1.600 Joer, en eegestännegt Fest. Mee et ginn awer och Kulturen, an deene Päischten eng Feier ass, fir der Natur, déi nees erwächt ass, Moien ze soen, an domat weess een, datt de Summer virun der Dier steet, an de Wanter endlech eriwwer ass. Päischten ass och meeschtens no den Äishellegen.
An dann hei zu Lëtzebuerg hu mir ëmmer d'Gënzefest zu Wolz op Päischtméindeg an d'Sprangprëssessioun zu Iechternach um Päischtdënschdeg. Voilà, dat ass also Päischten.
Elo awer bei eis Experiment vun haut, wou et, jo, emol musikalesch gëtt. De Joseph Rodesch an de Jean Claude Majerus verroden eis, ëm wat et geet.
Hei nach de Link fir dëst Experiment
