Et gëtt vill Geschwätz ëm dat, wat Konscht ass, wéi eng Roll se an eiser Gesellschaft anhëlt, a wat fir eng Funktiounen se erfëlle soll. Am Idealfall kann d’Konscht eppes ausdrécken, dat iwwer aner Kanäl net auszedrécken ass. Si ka beréieren, iwwerraschen, ofschrecken, begeeschteren, langweilen, sozialkritesch sinn … sou wäit sou gutt, zumindest an der Theorie. Oder ass dat a Wierklechkeet alles just waarm Loft?
Mat hirem Projet “Konscht - Wat soll dat?“ bréngen déi zwee Konschtschafend Liz Lambert a Jacques Schmitz an de Raimlechkeete vun der EwB Kënschtler:innen an hire Public zesummen an testen d’Konscht als Kommunikatiounsmëttel an der Praxis - fort vun de wäisse Maueren an der Galerie, hin zum direkte Kontakt mat de Leit: Wat fir Froen, Associatiounen a Reaktioune kommen op? Jeeweils zwee Konschtschafender weisen eng Selektioun u Wierker, unhand vun deene sech op eng virwëlzeg souwéi kritesch Rees ronderëm d’Fro “Wat soll dat Ganzt iwwerhaapt?“ gemaach gëtt. Explikatioune mat der Liz Lambert, Chargée de Communication an der EwB a Fotokënschtlerin.
(www.ewb.lu)
Erausgepickt: Den éischten Owend vum Workshop ass de 26.02. um 18:30 Auer an der EwB.