100komma7.lu

/ Retronom

A Retronom geet et ëm déi kleng an déi grouss Geschichten aus der Vergaangenheet vu Lëtzebuerg. Vun den Epochen hier setzt de Podcast sech keng Grenzen. Et geet vum 20. Joerhonnert déi eng Woch an d’Mëttelalter déi nächst, et geet vun de Kelten um Tëtelbierg bei d’Grofen um Bockfiels an zu Veianen, genau esou wéi et vum 2. Weltkrich déi eng Episod bei déi franséisch Revolutioun déi nächst ka goen, alles mat engem spezifesch Lëtzebuerger Bléck.

De Podcast wëllt informéieren an ënnerhalen. E mécht dat op Basis vun enger zolitter Expertise mat zwee haaptberufflechen Historiker, déi zënter Joren akademesch Rigueur mat der Ambitioun verbannen, dëst Wësse jidderengem zougänglech ze maachen, dee sech fir d’Geschicht vum Land interesséiert.

De Vincent Artuso schafft virun allem op der méi rezenter Zäitgeschicht. Hien huet seng Dokteraarbecht iwwer d’Kollaboratioun zu Lëtzebuerg am Zweete Weltkrich geschriwwen.

De Pit Péporté ass Spezialist fir d’Mëttelalter. Hien huet seng Thees doriwwer geschriwwen, wéi a firwat grad de Grof Siegfried mam Melusina, souwéi d’Ermesinde an de Jang de Blanne mat zu de gréisste Mythen vun der Lëtzebuerger Geschicht gi sinn.

De Vincent Artuso an de Pit Péporté presentéieren a Retronom déi grouss Momenter, awer och manner Bekanntes. Si erklären, wéi d’Mythe sech mat de wëssenschaftleche Fakten decken a liwweren nieft de Fakten och déi néideg Expertis, fir hire Kontext ze verstoen, hir Bedeitung anzeschätzen an hiren Afloss bis haut ze beleeën.

Nei Episode ginn et ëmmer donneschdes.

Episoden

Lëtzebuerg: Tëschent Resistenz a Collaboratioun – D'Geschicht vum Charles Ketter

22.10.2026 - 05h00

Wärend sech vill Leit ënner der däitscher Okkupatioun duerch den Alldag gewurschtelt hunn, waren e puer Lëtzebuerger iwwerzeegten Nazien. Dës Episode weist esou e Fall.

Lëtzebuerg: Tëschent Resistenz a Collaboratioun – Eng Famill wiesselt d'Säiten

15.10.2026 - 05h00

Wie war e Collaborateur a wien e Resistenzler? D’Äntwert war net ëmmer esou einfach, wéi ee mengt

Interview mam Pit Péporté a Vincent Artuso

10.10.2026 - 05h00

Déi zwee Historiker erzielen, wat et mam neie Podcast Retronom op sech huet

De Roude Léiw ass e Migrant

08.10.2026 - 05h00

En ass zënter bal 800 Joer e Symbol fir Lëtzebuerg. Mee wou kënnt de Roude Léiw hier? Eng Spueresich féiert an d’13. Joerhonnert, bei déi deemoleg Grofefamill, hir Kricher an hir Allianzen