Bis elo war den Handy a Frankräich just an de Primärschoulen an an de Collègen verbueden. Mat dëser Rentrée gëllt d'Verbuet och an de Lycéeën.
Nach kee gesetzleche Kader
Am Gesetzestext heescht et, datt déi intern Reglementer an de Gebaier ugepasst musse ginn. Dat brauch Zäit an dowéinst wäert d’Verbuet zwar vun haut un offiziell a Kraaft sinn, mee wuel an de mannste Lycéeën applizéiert ginn.
De Verband vun den Enseignanten an och vill Juristen haten an de leschte Woche kritiséiert, datt nach vill rechtlech an organisatoresch Froen net gekläert sinn. Zum Beispill, wou d’Handye solle stockéiert ginn oder wien haftbar ass, wann en Handy verluer geet oder beschiedegt gëtt.
Sexuell Iwwergrëffer an de Schoulen
Fir vill Eltere steet awer bei der Rentrée e ganz anere Sujet am Fokus. An de leschte Méint koum et ëmmer nees zu Fäll vu sexueller Gewalt am franséische Schoulsystem, notamment zu Paräis. Hei lafen den Ament eng 200 Enquêtë wéinst sexuellen Iwwergrëffer.
Den Educatiounsminister Édouard Geffray sot op enger Pressekonferenz, et géif alles ënnerholl ginn, fir d’Schüler:innen ze schützen. Ënner anerem wäert een am November mat Hëllef vun engem Questionnaire an de Schoulen de Jonken d’Chance ginn, hir Erfarunge matzedeelen, wéi de Minister op France Inter erkläert huet.
Nationaalt Regëster fir Täter besser ze erkennen
Iwwerdeems wëllt d’Regierung en nationaalt Rëgester schafen, an deem Persounen aus dem Enseignement opgelëscht ginn, déi wéinst sexuellen Iwwergrëffer entlooss goufen, fir datt si dono net méi an anere Schoule kënne schaffen.
