Et gi Beruffer, an deenen Nofro kontinuéierlech klëmmt a wéineg vun Automatiséierunge bedrot sinn. Notamment am Santés- an am soziale Beräich, seet d'Ines Baer, Responsabel fir d'Statistike vun der ADEM.
"Fir de Rescht ass den Aarbechtsmarché immens evolutiv. Et ass schwéier haut kënnen ze soen, wéi gesäit et an zéng oder souguer vläicht a fënnef Joer aus."
Verschidde Krittäre fir op d'Lëscht ze kommen
Dëst Joer sinn zum Beispill direkt e puer Beruffer aus dem mechanesche Beräich op d'Lëscht opgeholl ginn. Dobäi baséiert d'ADEM sech op Krittäre wéi der Nofro no Posten, Posten, fir déi wéineg Kandidatinnen a Kandidaten a Fro kommen, a Posten, fir déi et guer keng passend Kandidatinnen a Kandidate gëtt, erkläert d'Ines Baer.
Déi Lëscht gëtt net just de Patronen een Iwwerbléck. Et hëlleft hinnen och fir Leit baussent der EU ze rekrutéieren.
Komplett ass déi Lëscht awer net. Dat well et och Beruffer ginn, déi net duerch d'ADEM lafen, zum Beispill den Dokteschberuff, deen trotzdeem och als très en penurie gëllt.
