D’Zeitung “Financial Times” hat Enn August gemellt, datt déi fréier Direkteren EU-Sanktiounen ëmgaangen hätten. Den CSSF-Generaldirekter Claude Marx sengersäits sot, datt déi entspriechend Informatioune vun der brittescher Zeitung "net onbedéngt richteg" wieren.
CSSF-Direkter weist d'Kritik vu sech
Et hätt ee seng Aarbecht gemaach, net eréischt zënter deem Artikel. D’Financial Times géif zënter ville Joren e Bild vu Lëtzebuerg zeechnen, dat net ganz glorräich wier.
"Si schwätze vu light touch regulation, déi et hei géif ginn. Dee beschte Juge, ob zu Lëtzebuerg seriö kontrolléiert gëtt oder net, dee fannt Dir, wann Dir international Banken an aner Dienstleister froe gitt, déi a ville Länner operéieren."
Si selwer hätte keng Meenung dozou.
"Wa si der Meenung sinn, mir géife keng seriö Aarbecht hei zu Lëtzebuerg maachen, huele mir dat zur Kenntnis."
Den CSV-Finanzminister Gilles Roth huet betount, et wier net seng Aufgab ze kucken, ob Sanktiounen ëmgaange goufen oder net.
"Ech kann Iech soen, dass op der Lëtzebuerger Finanzplaz souwuel vun de Justizautoritéiten, wéi och vun eiser Bankenopsiicht, der CSSF, déi Aarbecht mat grousser Suergfalt gemaach gëtt."
D’Oppositiounsdeputéiert hunn dann och fonnt, datt si net méi schlau gi wieren. D’LSAP an déi gréng hate gefrot, fir an der Kommissioun iwwer d’Affär Gazprombank ze schwätzen.
