Et ass déi drëtt Canicule a Frankräich a manner wéi zwee Méint. Gëschter ass zu Marseille den Temperaturrekord gebrach ginn, mat 40 Grad.
D‘Hëtztwell soll nach bis de 14. Juli a Frankräich unhalen.
D'Bëschbränn a Frankräich fanne keen Enn
Zënter e Samschdeg brennt et am franséischen Departement Pyrénées-Orientales. D'Feier huet mëttlerweil 4.900 Hektar verbrannt an ass nach ëmmer net ënner Kontroll. Haut ass de Risiko fir weider Bränn nees immens héich a Frankräich.
Gëschter huet e Grupp vun Deputéierten e Gesetzesprojet annoncéiert, deen esou Bränn an Zukunft reduzéiere soll.
Feier breet sech weider aus
Knapp war d'Feier an de Pyrénées-Orientales e wéineg méi kontrolléiert, huet et gëschter nees plazeweis ugefaangen ze brennen. Wéinst dësem Feier hunn eng 12.000 Persoune missen de Weekend evakuéiert ginn.
Mee net nëmmen hei gräifen d'Flamen ëm sech.
Am Departement Drôme am Südoste vum Land sinn zënter enger Woch iwwer 400 Pompjeeën am Asaz fir d'Feier ze meeschteren, dat sech schonn op 2.500 Hektar ausgebreet huet. Zënter dem 1. Juli sinn am Hexagon insgesamt 7.800 Hektar a Flamen opgaangen. Dat si méi wéi duebel esou vill wéi am ganze Mount Juli zejoert.
Wäerte wuel net déi lescht Bränn bleiwen
Haut da kéinten nach e puer Bränn dobäikommen, besonnesch am Mëttelmierraum ass de Risiko immens héich. Insgesamt schätzt Météo France, datt haut d'Hallschent vum Land ënner héijem Risiko vu Bëschbränn steet. Dat hänkt natierlech mat der Canicule zesummen, déi sech iwwer d'Land ausbreet. Haut stinn 72 Departementer ënner der zweethéchster Warnstuf fir Hëtzt. Scho gëschter gouf op ville Plazen am Land den Temperaturrekord geknackt.
Politiker leeë Plang vir
Fir sech op d'Zukunft ze preparéieren huet e Grupp vu 50 Deputéierten – majoritär vun der Gauche – gëschter annoncéiert, datt een e Gesetzesprojet wëllt abréngen, deen e Fond virgesäit, fir d'Bëscher besser géint Feier ze schützen an un d'Canicullen ze adaptéieren. Ënner anerem proposéiere si méi Fierschter ze rekrutéieren a méi Suen an d'Duerchforstung vun de Bëscher ze investéieren.
