Aktuell gëtt nach ëmmer op den Avis vum Staatsrot gewaart. Enn dës Joers leeft den Accord awer schonn nees aus a muss da retroaktiv applizéiert ginn. Dat géif en enorme Rateschwanz mat sech zéien, seet den FGFC-President Claude Reuter.
"Do si Leit, déi sinn an d'Pensioun gaangen, déi hunn d'Gemeng gewiesselt, si vläicht esouguer bei de Staat gaangen, hunn de Changement de carrière gemaach..."
Et wier net einfach fir d'Ressources Humaines fir d'Retroaktivitéit zënter 10 Joer ze berücktsichtegen, sou de Claude Reuter an "den Accord salarial vu virdrun an nach vu virdrun ware mer och ëmmer am Retard an da kënnt nach dobäi". Et géifen och nach Texter beim Staatsrot leien.
Suergen ëm den TICE
Suerge mécht d'FGFC sech iwwerdeems ëm d'Zukunft vum Bus-Syndikat TICE. Deem seng Existenz ass wéinst de schwaache Gemengefinanze méiglecherweis a Fro gestallt. Hei wier de Staat gefuerdert, fir de Süd-Syndicat finanziell ze ënnerstëtzen.
Et wier een hellhéireg gi wéi de fréiere Mobilitéitsminister François Bausch den Dossier RGTR an d‘Rei bruecht hätt a beim Dossier TICE op déi nächst Regierung verwisen hätt, sou de President vu der Gewerkschaft vum Gemengepersonal FGFC Claude Reuter. Wéinst de schwaache Gemengefinanze géif ee sech Suergen ëm d‘Zukunft vum Bussyndikat maachen, mee hei wier och de Staat gefrot. Als FGFC géif ee gär mat agebonne ginn an et wier ee léisungsorientéiert, sou de Claude Reuter.
"Mir wëssen, datt dat do keng einfach Nummer ass an datt d'Gemengefinanzen e bëssen an der Schiflag sinn an ëmmer méi wäerte kommen. Mee da brauche mer hei awer de Staat, deen op aner Plaze Milliarden investéiert. Da wäert en och hei iergendwou déi 20 Millioune fannen."