Iwwer 4 Mol 7,5 Kilometer geet d’Staffel bei de Fraen haut an der Mëttesstonn. An all Ekipp si 4 Athleetinnen, déi jeeweils en Deel vun der Streck lafen a sech dann ofléisen. Bei den olympesche Wanterspiller däerf dann all Land och just eng Ekipp un den Depart schécken. Beim Weltcup ass dat anescht, do däerf ee Land méi Staffele stellen.
Et ass awer net esou wéi wann all Laf fir all Athleetin bei der Staffel d’nämlech wier. Déi éischt zwou Leeferinne mussen nämlech an der klassescher Variant untrieden – déi zwou Lescht an der fräier Technik, déi och Skating genannt gëtt.
Klassesch Technik vs. Skating
Bei der klassescher Technik glëtschen d’Leefer souzesoen duerch scho virgefäerdegt a markéiert Schispueren. Beim Skating ginn et déi virgefäerdegt Spueren net – Do stoussen sech d’Athleete mat säitleche Beweegunge mat de Been of fir weiderzekommen. Als Hëllef kann een do natierlech seng Schibengele benotzen.
Ween elo awer mengt Laanglaf wier just mat de Schi duerch d’Géigend spadséieren deen iert. Nieft der Ausdauer déi ee brauch, gi 600 Muskele gebraucht fir déi richteg Beweegungen auszeféieren. Deemno kënne beim Laanglaf bis zu 95 Prozent vun der Muskulatur aktivéiert ginn.
Favorittinnen an der Course vun haut sinn d’Schweedinnen an d’Norwegerinnen. Mee och d’Amerikanerinne sinn net ze ënnerschätzen a kéinten op de Podium kommen.
