Am Januar 2025 war de René Benko festgeholl ginn. Leschte Mount gouf hie verurteelt.
Elo däerf den Entrepreneur awer aus dem Prisong eraus, dat mat enger Foussfessel an den Hausarrest. Déi Demande huet d'Landesgericht Innsbruck dem 49 Joer ale fréiere Milliardär zougesprach.
Weider Prozesser sti virun der Dier
Dem René Benko säin Affekot hat domat argumentéiert, datt hie sech just baussent dem Prisong adequat op weider Prozesser kéint virbereeden.
Ganz aus dem Schneider ass de René Benko awer net: Uganks November muss sech de Geschäftsmann – nees a senger Heemechtsstad Innsbruck – viru Geriicht veräntwerten. D'Virwërf sinn do: Schwéier Fraude an nees d'Schiedegung vu senge Creancieren.
Iwwerdeems enquêtéiert den éisträichesche Wirtschafts- a Korruptiounsparquet nach wéinst Fraude, Bankrott a Verontreiung géint de René Benko.
