Et géif sech ëm eng Serie vu suspekte Viremente vun am Ganzen 160.000 Euro handelen. Dat huet d‘Philharmonie gëschter an engem Communiqué matgedeelt. D‘Direktioun vun der Philharmonie géif mat den Autoritéite kooperéiere fir déi verdächteg Bankoperatiounen opzeklären.
Audit soll Opklärung bréngen
Et wier en onofhängegen Audit iwwer d‘Kontrollmechanisme bei der Philharmonie lancéiert ginn, fir eventuell Schwaachstellen ze identifizéieren a wann néideg Mesuren ze huelen.
Méi Detailer kéint d’Philharmonie den Ament wéinst der lafender Enquête net ginn. D‘Aktivitéite vun der Philharmonie géifen normal weider lafen.
Enquête preliminär beim Parquet
De Parquet huet eng preliminär Enquête opgemaach wéinst de méiglechen Detournementer bei der Philharmonie. Dat seet de Justizspriecher Henri Eippers op Nofro hin. Ob a wéini een Untersuchungsriichter mat ageschalt gëtt bleift ofzewaarden, esou de Justizspriecher.
