Am Äisschnellaf ginn et insgesamt 7 verschidden Disziplinnen. Ugefaange mat 5 verschiddenen Distanzen: Déi kierzt ass 500 Meter, déi längst 10.000 Meter. Dobäi kommen nach de Massestart an d’Team-Verfollgung.
Gelaf gëtt op enger 400 Meter laanger, ovaler Äisbunn, déi an zwou Spueren agedeelt ass. Bis op de Massesprint an d’Team-Verfollgung trieden d’Athleetinnen an Athleeten nämlech am 1 géint 1 un.
Ënnerschiddlech Wertungen
Herno ginn d’Zäiten awer alleguer eenzel madenee verglach. Esou kann een zwar säin 1 géint 1 verluer hunn, an awer eng Medail gewannen. Just op 500 Meter ginn et puer Duerchgäng, an déi eenzel Zäite ginn addéiert.
Am Masseprint, wou bis zu 24 Äisschnell-Leefer- oder Leeferinnen un den Depart ginn, ass dat e bëssen aanecht. Alles an allem ginn hei 16 Ronne gelaf. No all 4. Ronn kritt ee Punkten. Wat ee méi wäit vir ass, wat ee méi Punkte kritt. Et ass also eng taktesch Course.
Aerodynamik ass alles
Fir sech esou séier um Äis ze beweegen, wéi d’Äisschnelleefer dat maachen, kënnt et och op d’Material un. Virop d’Schlittschong, bei deenen d’Eisen laang, a just e puer Milimeter dënn sinn. Zu Beefort op der Äispist géing eiseree keng 3 Sekonnen dorop stoe bleiwen.
Fir de Rescht hunn d’Athleeten e sougenannte Skin suit un. Eng Zort hauchdënnen Ganzkierper-Kostüm, dee ganz enk op der Haut opläit, an d’Aerodynamik vun den Äisschnelleefer verbessert.
A wann Dir iech d’Kompetitiounen ukuckt, dann haalt en Aen op déi orange Skin Suites: Dat sinn d’Hollänner, déi traditionell zu de beschten Natiounen am Äisschnelllaf zielen.
