"Land Of Mine" vum däneschen Zeenarist a Realisateur Martin Zandvliet hat d'lescht Joer zu Lëtzebuerg um Filmfestival den Haaptpräis gewonnen. De Film, mam Originaltitel "Under Sandet", huet och op diversen anere Festivale Präisser agesammelt, an ass dann elo endlech och am reguläre Kinosprogramm erauskomm.
Et geet ëm däitsch Kannerzaldoten, déi direkt no der Liberatioun vun 1945 musse Minen op den dänesche Plagen ewechraumen, déi hir eegen Arméi do vergruewen hat. Vill vun de Bouwe ginn dobäi an d'Luucht gesprengt. D'Stäerkte vun dësem klassesch inzeenéierten Drama sinn eng beandrockend Naturkuliss, an déi groussaarteg schauspilleresch Leeschtung vun deem gréisstendeels bluttjonke Cast. De Christian Mosar rechent domat, datt "Land Of Mine" amerikanesch Produktiounsfirme staark interesséiere wäert. Et ass déi Zort Film, déi no engem Remake jäizt.
