D’Associatioun GERO, mam Accord vum Familljeministère, setzt sech zu Lëtzebuerg fir Senioren a Seniorinnen an, awer ouni als Lobby ze agéieren. Anescht wéi associativ Gruppementer vun eelere Leit fokusséiert GERO sech op Etuden a Projeten, déi d‘Wuel vun eelere Leit verbessere sollen. Mat enger ëmmer méi grousser Zuel vun eelere Leit gëtt d’Nofro no Participatioun an enger staarker Stëmm ëmmer méi wichteg.
Obwuel vill Senioren a Benevolat-Projeten aktiv sinn, geet d’politescht Engagement zeréck, méiglecherweis well vill zefridde sinn a kee Grond gesinn, sech anzebréngen. Besonnesch beim Theema Pensioun feelt et un enger direkter a staarker Stëmm vun den eelere Leit selwer, déi hire Standpunkt an Debatten abrénge kënnen. Andeems d’Senioren a Seniorinne sech besser organiséieren, kéinte si hir Bedierfnesser méi kloer zum Ausdrock bréngen an hiren Afloss op sozial a politesch Entscheedunge stäerken. Explikatioune vum Alain Brever, Direkter vum Gero Kompetenzzenter fir den Alter (www.gero.lu)