Aus dem Liewen

Als Member vun Hands On! - International Association Of Children In Museums an ausgezeechent mam Label Home of 21st Century Education, leet de Kannermusée Plomm grousse Wäert op deen interaktiven Aspekt vu senger Offer. Ob an den Ausstellungen oder an den Atelieren - iwwerall gëtt et Neies ze entdecken an auszetesten. Ganz an deem Sënn an duerch eng partizipativ Approche, dierf wärend de geféierten Entdeckungstouren duerch d’Ausstellunge geklotert, gekrabbelt a geschwat ginn, d‘Kanner kënnen alles upaken an all d‘Knäppercher drécken. Si kënne sech Geschichten ulauschteren, awer och neier erfannen an dës selwer erliewen. Duerch d‘Mediatioun an d’Mise en scène, déi op de jeeweilege Public ugepasst ginn, ginn d’Kanner mat op eng Rees geholl. Virgi vum Label Home of 21st Century Education ass, datt d’Kanner sech wéi doheem fillen, d’Offer einfach an accessibel ass, d’Kanner spilleresch mat alle Sënner léieren an als engagéiert Bierger:inne vu muer am intergenerationellen Dialog stinn a gehéiert ginn. Explikatioune mat der Paulina Dabrowska vum Kannermusée PLOMM (www.plomm.lu)