Kënnt der iech nach un är Kandheet erënneren, krut der och doheem fir aschlofen oder wann ee net eraus duerft Geschichten erzielt. An hutt der déi Geschichten dann och verhalen, an se spéider ären eegene Kanner och weider erzielt.
"Et war emol..." bis bei "A wa se net gestuerwen dann danze se nach haut" , sou hu vill Geschichten ugefaangen an opgehalen. Mä Geschichten erzielen ass awer vill méi wéi just nëmme Märercher vun de Bridder Grimm, dem Hans Christian Anderssen, oder déi sëllegen Geschichten vun der Astrid Lindgren an esou weider. Geschichten erzielen ass eng Konscht, eng Konscht déi a ville Kulturen eng Joerhonnert wann net esou guer Joerdausende Laang Traditioun huet.
Invitée an der Emisioun Sot emol beim Jean Claude Majerus ass d'Betsy Dentzer, a si ass Erzielerin an Theaterpedagogin.Vu der Kandheet un huet d'Betsy Dentzer gäre gelies an och Geschichten hate et hir schonn ugedoen. Nom Lycée huet se sech studéiert a sech do an d'sozial Aarbecht era geknéit well och hir Elteren an dem Beräich geschafft. Mä am Hannerkapp war d'Literatur awer ëmmer present, an se huet op der "Universität der Künste" zu Berlin weider studéiert huet, a genee do koum dann de ganz intensive Kontakt mat der Erzielkonscht mat enger vun hiren Dozentinnen op der Uni, an dat war wéi d'Betsy Dentzer, wéi si et nennt en Aha-Ament an hiren Liewen,
"Eng ganz impressionant Fra d'Kristin Wardetzy, wat eng vun den Erzielkoryphäen ass, genee an do war esou e Cour "Erzählstoffe der Welt" an si huet do ugefaangen e bëssen ze erzielen, also ganz vill verschidde Saachen.(...) Si huet dunn op engem Owend, do hunn ech geduecht ech géing net richteg erliewen, si huet siwe Stonnen laang, d'Odyssee erzielt.(..) A ech hu geduecht siwe Stonne laang do gëss de jo geckeg. Nee, dat war genial.(...) An do hunn ech geduecht., ech wëll dat och maachen, dat ass jo mega."
