Zanter zwee Joer ass de Mehdi Magha Direkter vun der ONG Handicap International Lëtzebuerg. Am Januar ass hien an den Afghanistan gereest, fir den Ausmooss an d'Besoine vun der humanitärer Situatioun ze erfaassen.
Sechs Méint nodeems d'Taliban d'Muecht iwwerholl hunn, weist sech ëmmer méi, datt déi radikal islamesch Taliban der Erausfuerderung net gewuess sinn d'Land ze regéieren. Den Afghanistan gouf zwar méi sécher, d'Taliban hunn awer d'Mënscherechter massiv ageschränkt. Grad dofir huet d'international Communautéit Hëllefsprogrammer agefruer. Nieft der Wirtschaftskris kréien d'Leit d'Konsequenzen dovun ëmmer méi ze spieren.
Éier de Mehdi Magha bei Handicap International war, huet hien am Secteur vun der ëffentlecher Medezin geschafft, zum Beispill fir Campagnen am Beräich vun der Santé publique ze entwéckelen. 2014 zitt d'Ebola-Kris hie bei MSF mat der Iwwerzeegung, datt hien e professionellen Humanitär wëllt ginn.
Zanter 1996 am Süden zu Kandahar aktiv, huet d'ONG scho bis 2001 ënner den Taliban geschafft. Um Ament, wou d'Taliban am Juli d'lescht Joer nees d'Muecht iwwerholl hunn, hunn déi Responsabel vun Handicap International decidéiert, um Hindukusch ze bleiwen. 2020 huet d'ONG Handicap International iwwer 17.000 Afghane behandelt.
"Fir eis ass et extreem wichteg ze bleiwen, eis Aarbecht virunzeféieren. Eis Entwécklungsprojeten am Afghanistan lafen an enger laangfristeger Optik. Dofir brauche mir och eng laangfristeg finanziell Ënnerstëtzung. Mir plange souguer eis Aktivitéiten auszebauen. Well zanter de Konflikt tëschent den Taliban an den Alliéierten am Juli op en Enn gaangen ass mierke mir, datt méi Leit an d'Klinicken, respektiv bei eis an d'Reeducatiounszentere kommen. D'Leit hunn et elo méi einfach fir dohinner ze kommen."
