Zanter 2020 ass de Claude D. Conter Direkter vun der Nationalbibliothéik. Virdru war hie laang Jore Responsabel vum Centre national de littérature zu Miersch.
Vu Formatioun ass de Claude D. Conter Germanist a Literaturwëssenschaftler an nieft der Sprooch an der Literatur interesséiert hie sech vill fir d'Geschicht vun de Bicher an de Bibliothéiken. Als Direkter vun der Nationalbibliothéik ass hie mat ville verschiddene Projeten a Chantiere chargéiert, wéi zum Beispill enger neier Software. Op alle Fall faszinant Projeten, déi d'Bibliothéik an der Vernetzung an dem Notze weiderbréngen.
De Wee bei d'Liesen an d'Literatur huet beim Claude D. Conter scho ganz fréi ugefaangen, als Kand huet hie scho vill geliest, ënner anerem BDe wéi den "Tintin". Hien ass an enger Famill grouss ginn, an där si zwar ni an eng Bibliothéik gaange sinn, mee an dàr ëmmer gesot gouf, wann een d'Bicher gären hätt, da wieren dofir och Suen do. Seng Elteren hunn d'Bicher alleguerte kaf an deemno gouf vill gelies.
Et ass awer net esou, datt d'Liesen als Kand de Claude D. Conter op de Wee vun der däitscher Literaturwëssenschaft bruecht huet. De Claude Conter wollt u sech Medezin studéieren, an hien huet sech eréischt op der Première anescht decidéiert.
"Och e bëssen ënner dem schéinen Afloss vun engem Däitschproff, deen ech dräi Joer hat, dat war de Gast Mannes. Also eng Geschicht, déi mir ëmmer afält: Hien huet deemools vum Arno Schmidt "Zettel's Traum" mat an d'Klass bruecht. Hie war deemools scho bei de Schüler bekannt, als een, deen Bicher gären hat, e Collectionneur war. (...) Et war d'Faksimile-Ausgab vun "Zettel's Traum", déi huet e gewëssenen Wäert an hien huet déi einfach an d'Klass ginn, déi ass duerch Bänke gaangen. An dat war e besonneschen Ament, well mir wossten, datt et e besonnescht Buch war."
