Wann een e Mënsch misst nennen, bei deem den Theater a quasi alle Liewenssituatiounen eng grouss Plaz anhëlt, da kënnt engem sécher den Numm Myriam Muller mat als éischt an de Kapp. D'Myriam Muller ass Actrice, Regisseurin, si ass Enseignante fir Dictioun an Art dramatique am Stater Conservatoire a si ass Directrice vun engem Theater, nämlech den Théâtre du Centaure. An och privat an der Partnerschaft ass den Theater present. Dobäi war um Ufank den Theater awer u sech den zweete Choix, well der Myriam Muller hir éischt Léift war den Danz.
Aus der Dänzerin gouf eng Actrice
Scho ganz fréi als Kand huet d'Myriam Muller mam Danz ugefaangen an am Stater Conservatoire hir Formatioun gemaach. Den Danz sollt awer méi gi wéi just en Hobby. De Beruffswonsch hat sech scho forméiert. D'Myriam Muller huet et esou guer bis an d'Auditioun vun der Paräisser Oper gepackt, mee et koum anescht.
" Et war wierklech a menger Schlussauditioun zu Paräis, ech hat Auditiounen all gepackt fir Petit Rat ze ginn. An et war Schlussauditioun, wou mer awer nach zu achtzeg ware fir zwanzeg Plazen oder eng siechzeg fir zwanzeg Plazen. Also vun deenen dräi Dausend, déi virgedanzt hunn, war ech am leschten Tableau. An dunn hunn ech eng Fugue gemaach, ech sinn einfach net gaangen, ech sinn de ganzen Dag duerch Paräis gerannt. An dat war esou total dramatesch."
E Stéck Theatergeschicht
Aus den Danzcoursen sinn dunn Theatercourse ginn, a besonnesch d'Marja Leena Junker huet d'Myriam Muller ënnerstëtzt, un d'Actrice gegleeft an hir de Wee an den Theater gewisen. D'Myriam Muller ass eng fest etabléiert Actrice, Directrice vum Théâtre du Centaure an huet an de leschte Joren d'Léif zur Mise en scène entdeckt. Am Theater zu Lëtzebuerg huet si e Stéck Theatergeschicht geschriwwen an zwar mat der Eve Ensler hire "Monologues du Vagin", wou si zesumme mat der Marie-Paule von Roesgen an der Marja Leena Junker op der Bün stoung. Déi Lëtzebuerger Produktioun, déi bis ewell am dackste gespillt gouf. Iwwer 300 Mol an dat iwwer fënnef-sechs Joer verspreet. Mee iergendwa geet et awer duer.
"Et war een Ament zwar, du hu mer eis geduecht, besonnesch d'Marie-Paule an ech, do hate mer es op emol genuch: Awer ech mengen d'Marja Leena géif et elo nach spillen"
