De Lukas Held ass deene meeschten Nolauschter:inne bekannt aus der Emissioun "Seismograph", wou hien all Donneschdeg seng Gedanke fléisse léisst zu deene verschiddenste Sujeten, déi zum Alldag gehéieren. Zum Beispill: Wat ass e schwaache Wëllen, kann een net wëllen, wat ass een Ereegnes, oder d'Perceptioun vun der Zäit?
Déi grouss Fro ass natierlech och: Wat ass Philosophie a wat ass e Philosoph? De Lukas Held géif sech selwer net direkt e Philosoph nennen, well hien nach ze vill Respekt virun där Denominatioun huet. Hien huet zwar e Masterdiplom, gesäit sech awer éischter als "Philosophielehrer" oder "Philosophievermittler"
"Filmstudies" oder Philosophie
An de belsche Lycéeë gëtt et, am Géigesaz zu de Lëtzebuerger Lycéeën, keen eigentleche Philosophiecours. Dofir koum de Lukas Held iwwer säi Latäincours bei d'Philosophie, wou hien dunn déi antik Philosophe kennegeléiert huet.
Oder och am Däitschen, wou se Nietzsche a Goethe gelies hunn, a säin Intressi ass ëmmer méi gewuess.
"Ech hunn eng Zäitchen gehadert tëschent Filmstudies a Philosophie. Meng Elteren hunn dunn awer fonnt, datt Philosophie eng besser Optioun wier, ech weess och net wisou. Mee ech sinn hinnen awer immens dankbar dofir, datt si dat ëmmer ënnerstëtzt hunn a mech encouragéiert hunn, well et ass jo awer och fir e jonke Mënsch elo kee Studium, deen onbedéngt eng grouss Karriär souzesoen versprécht, et ass elo net Medezin oder Droit."
"Ech hu keng Mammesprooch"
Dem Lukas Held seng Elteren sinn aus Neu-Belgien, d'Géigend vun der däitschsproocheger Communautéit an der Belsch ronderëm Eupen a Sankt Vith. D'Famill huet zu Lëtzebuerg gelieft an de Lukas Held ass zu Sankt Vith an d'Schoul gaangen. An duerch déi Situatioun huet de Lukas Held eng éischter gedeelte Relatioun zu Begrëffer wéi Heemecht oder och zur Sprooch.
"Dat Däitscht, dat ech schwätzen, do ass e groussen Accent dran an och a mengem Lëtzebuergeschen ass, wéi ee jo héiert, e groussen Accent, am Franséischen ass e groussen Accent. Am Fong hunn ech keng Mammesprooch."
Hie spiert sech wuel am Däitsche besser, mee wann hien an Däitschland geet, gëtt hie gefrot, ob hien Hollänner oder Fransous wier. Oder och zu Lëtzebuerg héiert een, datt de Lukas Held net vun hei ass.
"Iwwerall héiert een, datt ech net vun hei sinn, ech sinn iwwerall net vun hei. Dat huet mech scho markéiert déi Situatioun, mir hunn zu Lëtzebuerg gewunnt, an zu Sankt Vith war ech dann an der Schoul, ëmmer déi Situatioun, datt een als Bäigezunnene betruecht gëtt, dat huet mech scho markéiert, vläicht och an engem gewëssene Sënn traumatiséiert. An dat féiert dozou, datt ech eben Begrëffer wéi Heimat und Vaterland an esou weider, ganz kritesch géintiwwer stinn."
