D'Jana Degrott ass voller Energie, si spruddelt vun Iddien, Valeuren a Visiounen, si ass virun allem déi éischt Lëtzebuergerin, déi fir de Programm Obama Foundation Leaders Europe erausgewielt gouf an huet den Ex President Barack Obama perséinlech begéint. Eng iwwerwältegend Experienz, mee och eng richteg Unerkennung fir d'Droits Studentin, déi schonn zanter Joren an der Politik engagéiert ass. Am Gemengerot zu Steesel zanter de leschten Walen, mee eigentlech huet hire politesche Wee schonn am Lycée ugefaangen.
D'Jana Degrott ergräift Initiativen an ënnerstëtzt Initiativen.
Als jonk Politikerin, als Juristin, an als Persoun mat schwaarzer Hautfaarf, wëllt si hir Roll spillen an enger Welt, an där jidderengem seng Ambitioun eleng vun Talent gedriwwen ass. D'Motivatioun fir sech politesch ze engagéieren ass hir Reaktioun op hir perséinlech an existenziell Froen: Wie sinn ech? Wat kann ech maachen?
Si geet dovunner aus, datt Kanner a Jonker vu politeschen Entscheedungen, déi haut getraff ginn, am längste betraff sinn, dowéinst misste Jonker méi a politesch Entscheedungsprozesser agebonne sinn.
D'Jana Degrott ass an Däitschland, zu München, gebuer, vun enger Mamm, déi aus dem Togo kënnt an engem Lëtzebuerger Papp. Mat siwe Joer koum si op Lëtzebuerg. Ëmmer am Sënn fir eppes wëllen ze bewierken, huet si d'Plattform We Belong Europe mat gegrënnt. Do geet et drëms Mënschen d'Wuert ze ginn, déi wëllen als Modell stoe fir Jonker.
D'Jana Degrott seet, si hätt selwer misste Stigmatisatioun a Stereotyppen iwwerwannen, an deem klenge schwaarze Meedche wëlle weisen, datt alles méiglech ass.
Nieft Rassismus an Diversitéit ass Inclusioun ee vun hire grouss Sujeten. Och aus enger erliefter Situatioun eraus, hire Brudder leit nämlech ënner enger Forme vun Autismus. Hir Mamm huet sech vill ëm hie gekëmmert an dat huet d'Jana Degrott markéiert a staark gemaach. Si betount awer och, datt een net onbedéngt muss politesch aktiv si fir eppes ze bewierken, et géifen och aner Méiglechkeete gi sech an enger Gesellschaft ze engagéieren. Wichteg wier säi politescht Bewosstsinn ze entwéckelen an als Mënsch ze wuessen. Engagement zum Beispill am Humanitären an am Sozialen.
D'Natasha Ehrmann féiert duerch d'Gespréich.
