An der Mediathéik vum Opus kann een aktuell zwee Concerte lauschteren, déi am Oktober um Echter’Classic Festival 2025 opgeholl goufen. Dëst Joer goufen et um Festival vill verschidde Concertsformater an och vill jonk Museker ware mat dobäi. En Deel vun de Concerte ware Showcasen, bei deene méi originell an innovativ Artisten an Ensembele virgestallt ginn.
Op engem vun de Concerte gëtt et traditionell griichesch an zypriotesch Musek, mat der lëtzebuergesch-griichescher Mezzosopranistin Daphné Souvatzi, dem Flamenco-Gittarist François Ara a sengem Quartett.
De Lëtzebuerger Volet spillt beim Echter’Classic Festival ëmmer eng grouss Roll an 2025 war et wichteg ze weisen, wat fir Lëtzebuerger Museker:innen et an der klassescher Musekszeen ginn a wat si alles kënnen. Bei engem Concert héiert een dofir de jonken Cellist Matis Grisó zesumme mat Museker:inne vum OCL (Orchestre de Chambre du Luxembourg) mat engem ukrainesch-russesche Programm aus dem 19. an 20. Joerhonnert.
Een drëtte Concert leeft dann um 8 Auer haut den Owend (10.12.) um Opus, an do ass Lëtzebuerg och vertrueden. De Chouer vum Ensemble vocal du Luxembourg, kuerz EVL, trëtt do zesumme mam Orchester L’Arpa Festante vu München op, mat italieenescher Musek aus der Zäit vum Barock.
