Et kann ee Fussball op verschidde Manéiere gären hunn: aktiv spillen, als Supporter agéieren oder zum Beispill iwwer de Fussball schreiwen an en aus engem Historikerbléck eraus analyséieren.
Den Hardy Grüne ass zanter senger Kandheet mam Fussball verbonnen an ass Adept vum Fussballveräi Göttingen 05. Als jonke Mënsch hat hien d'Passioun där Fussballspéngelen ze sammelen, sammelt awer och Wope vun de Veräiner. Dat huet alles lues a lues dozou geféiert, datt hie sech ëmmer méi mat der Geschicht vum Fussball beschäftegt huet an ugefaangen huet Bicher iwwer de Fussball ze schreiwen, dacks awer iwwer den däitsche Fussball oder och an anere Länner, déi net esou direkt op der éischter Plaz an der Fussballwelt stinn. Hien huet dann dacks de Kontext Fussball verbonne mat Reesen, déi hie gemaach huet, Reesen op Buenos Aires, Montvideo oder Albanien. Eng Zäit laang huet hien an England gelieft, souzesoen d’Wéi vum Fussball. Duerno huet hie sech mam Fussball a Frankräich, um afrikanesche Kontinent oder a Südamerika beschäftegt an um Enn och mam Lëtzebuerger Fussball. Säi Fussballshäerz schléit fir dräi Veräiner, wéi gesot an Däitschland Göttingen, an England Bristol an a Frankräich En avant Guingamp.
Zesumme mam Frank Willig vum Quartalmagasin Zeitpiel-Magazin für Fussball-Zeitgeschichte huet hien d’lescht Joer d’Buch iwwer de Lëtzebuerger Fussball erausbruecht: “Luxemburg - Geschichte einer Fussball-Liebe“.
