Fir sechs Méint zeréck an d’Heemecht? Déi Lëtzebuerger Molerin a Walhamburgerin Chantal Maquet huet d’Invitatioun vum Maarnecher Cube fir eng Kënschtlerinne-Residenz an der Ermitage vu Klierf ugeholl. A si huet sech mam Sujet befaasst, dee souzesoe virun der Dier louch: d’Heemecht, d’Verwuerzelung.
"Jo, Heemecht ... bei mir geet et ebe grad dorëms, datt mir alleguerten eng Heemecht hunn, an déi Heemecht, déi eis do ëmmer versprach gëtt, dat ass net onbedéngt déi, vun där ech schwätzen. Ech denken Heemecht éischter inklusiv an net exklusiv; also et bezitt alleguerten d’Mënschen an, déi hei sinn an heihinner kommen. Eng Heemecht ass och näischt, wat ee schütze muss, well eng Heemecht ass eng lieweg Geschicht!“, esou d‘Chantal Maquet.
Informatiounen iwwer d‘Molerin an hir Konscht fannt Dir op www.chantal-maquet.com.
