Dem CVS-Inneminister Léon Gloden no géif et sech dobäi ëm ee "Meilesteen an der Digitalisatioun am Gemengeberäich" handelen. Hien huet de Projet zesumme mat der DP-Ministerin fir Digitaliséierung Stéphanie Obertin virgestallt.
E strukturéierten Echange garantéieren
A Verglach zur aktueller Plattform e-MINT géif ee mat COSMOS ee méi breede Spektrum schafen, erkläert de Chef vum Departement “Processus et digitalisation” am Inneministère Philippe Schram.
"Mat COSMOS schafe mir elo e vill méi breede Spektrum, deen et erlaabt, tëschent dem Gemengesecteur an dem Gesamt-Zentralstaat, also alle Ministèren, e strukturéierten Echange ze garantéieren, wéi dat elo beispillsweis mat de Subsiden de Fall ass."
Once Only-Prinzip soll applizéiert ginn
Aktuell géifen 10 verschidde Ministèrë Subsiden un d'Gemenge verdeelen. Déi nei Plattform soll den Echange mat all de Partner-Ministèren erlaben, esou de Philippe Schram
Bei dësem Plattform-Projet geet et deemno ëm déi administrativ Vereinfachung a méi prezis ëm d’Schafe vun den néidege Konditioune fir de “Once Only”-Prinzip beim Austausch am Gemengesecteur. Also de Prinzip, datt Dokumenter an Daten nëmmen nach eng Kéier mussen agereecht ginn.
Déi nei Plattform COSMOS, déi d’lescht Woch ausgeschriwwe gouf, soll d’nächst Joer lancéiert ginn. Vun 2028 u sollen och d’Prozedure fir d’Bebauungspläng PAG a PAP doran integréiert ginn.
