D'Transparenzregëster war viru gutt dräi Joer ageféiert gi fir extern Interaktioun mat Deputéierte méi transparent ze maachen.
Dat aktuellt Transparenzregëster ass eng Exceltabell, an déi ee sech als Personne Physique oder Morale androe muss fir säin Uleies mat engem Deputéierte beschwätzen ze kënnen. Aus dem ëffentlech zougängegem Regëster géife just Basisinformatioun iwwer eng Persoun ervirgoen, heescht et am Rapport vun der Conférence des Présidents.
Regëster muss méi benotzerfrëndlech ginn
Déi eleng géifen awer net zu méi Transparenz bäidroen. Dofir gëtt am Rapport gefuerdert, datt misst ersiichtlech sinn, wéi eng Theemen diskutéiert géifen an och mat wéi engen Deputéierten.
D'Regëster misst och méi benotzerfrëndlech ginn, heescht et am Rapport. Dacks géifen net all déi néideg Informatiounen ausgefëllt ginn. An d'Transparenzregëster géif an der Praxis mol mam Handelsregëster verwiesselt ginn. Do misst méi Kloerheet geschafe ginn.
De Rapport ass eng Suite op eng Resolutioun vun der grénger Deputéierter Sam Tanson. Si hat zejoert gefuerdert, datt d'Fonctionnement vum Regëster misst ënner d'Lupp geholl ginn.
Claude Wiseler confirméiert, datt neie System en place gesat gëtt
De Chamberpresident Claude Wiseler huet am 100,7-Interview confirméiert, datt een amgaange wier d'Transparenzregëster ze iwwerschaffen. Et géif ee ganz neie System en place gesat ginn, esou de Claude Wiseler.
D'Transparentregëster war am Dezember 2021 ageféiert ginn. Zënterhier hunn sech 334 Persounen oder Betriber hei agedroen.
