Mir haten deen Interview ugefrot, nodeems d'EU-Kommissioun en Aktiounsplang presentéiert hat, deen d'EU besser op Naturkatastrophen oder Krich preparéiere soll. Verschidden Deputéiert hu kritiséiert, datt si esou wichteg Informatiounen iwwer d'Press géife gewuer ginn.
Net all Bierger:in kennt den Informatiounssite
Den DP-Deputéierten André Bauler huet d'Fro opgeworf, wéi d'Kommunikatiounsstrategie vum HCPN géif ausgesinn. Dat virum Hannergrond, datt net all Biergerin a Bierger den Informatiounssite infocrise.lu géife kennen.
Dozou huet de Premier Luc Frieden erkläert, datt den HCPN am Dezember zejoert den Optrag krut hätt en nationale Resilienzplang ze erstellen. An den nächste Méint wéilt een och iwwerpréiwen "wat een huet", an der Bevëlkerung matdeelen, wéi ee sech a verschiddene Situatioune behuele kann.
Paulette Lenert: Esou Annoncë kéinten d'Bierger:inne beonrouegen
Och d'LSAP-Politikerin Paulette Lenert huet sech besuergt gewisen iwwer d'Manéier, wéi Lëtzebuerg no der Annonce vun der EU-Kommissioun mam Sujet ëmgeet. Déi fréier Gesondheetsministesch huet virun allem drop verwisen, datt esou Annoncen d'Biergerinnen a Bierger kéinte beonrouegen an et zu Panik féiere kéint, wann eng Regierung net eenheetlech dozou géif kommunizéieren.
Et misst een dat richtegt Mëttelmooss fannen. Deementspriechend wier och de Site infocrise.lu den Ament net iwwersiichtlech genuch. Zum Beispill misst ee geziilt no Informatiounen iwwer den Urgence-Kit sichen, deen d'Stéit fir Krise solle prett hunn.
